Dunde u cumensa l'Apenin

Note culturali e naturalistiche sul territorio delle Quattro Province

il monte Alfeo, e il monte Carmo sullo sfondo, visti da Capanne di Cosola / Fabrizio Capecchi

 

cuntatti: redazione@appennino4p.it
chi ha missu insemme u situ ; diritti


English ; Deutsch ; Nederlands ; Français ; Occitan ; Català ; Castellano ; Sardu ; Italiano ; Ticinees ; Bulgnais ; Română ; dialetto di Voghera, Massinigo, Menconico, Artana, Daglio

[pronuncia]

L'Apenin, i munti che cumme in fii de scheŋŋa i travérsan tütta l'Italia, i cuménsan da u Türchin, dedatu a Vutri, pe andà a Lüsciàndria *. Quarchedun u piensa che u numme u ne vegne da Pen, diu lígure de selve e di munti, cuscì cumme u munte Penna, u Pénice e i Pentemin.

carta a grande scala Queste pàgine chí i l'en dedichè a u primmu tuccu d'Apenin, quellu setentriunale, in röu de munti e vallè spartíe inte quattru pruvince e regiuín diferenti: Zena (Ligüria), Lüsciàndria (Piemunte), Pavia (Lumbardia) e Piaxensa (Milia-Rumagna). Mascimamente, peró, l'è na zona in cun e meéxime üzanse (a gente a metteiva u gràn e e patate e a cüggeiva e castagne, i tegnivu crave e vacche e i feivu i paixi inte quellu moddu) ciù scímili tra vallà e vallà ciüttostu che versu a cianüa e u ma. Questi ligammi i l'en belli cei in ta mǘxica tradissiunale pupulare, che cuscì l'an ciamà de Quattru Pruvince: u moddu ciù giüstu pe parlà de sti pósti.


Ina tera de punti

Se sa che l'imaginasiun da gente a l'acübbia l'edificasiun de in punte a l'interventu destürbante du diau, e l'è fàssile capine u perchè: i punti i l'azonzu, u diau u l'è "quellu ch'u sparte". In ta cultüa pupulare ciù fullettu destürbante che incarnasiun du mà veru e própriu, u diau u l'insinua, in cu u su fa negativu, l'inmàgine da cuntradissiun ascusa in tütte e assiuín vutè a üní, a cavarcà, a traversà. In fondu, a sö disperà uppuzixun aa creasiun de cuntatti, zünte, cumünicassiuín, a l'ascunde in valuu: a difeiza de l'identitè e spesifisitè, peró scheita in tu malinteizu de serase a l'atru, de in refüu assolüu e stérile.

Se u punte göbbu de Böbbiu, cu l'ünisce e riive upposte da Trébbia, u m'à süggeriu queste cunsciderassiuín, l'è perchè in queste vallè, che uramai ciamemmu "de Quattru Pruvince", s'arescea in pin a cunplessitè di tanti cuntraditúi temmi de üniun e cunflitu, ciavuja e scangiu, avertüa e isulamentu. Vallè percurse da stre millenaje, vie marenche e vie da sà, tra menüssie de gea e curenti d'ègue, uupüre trai bütti de creste, d'azürru e verde, spegè a nord in nebie de cianüa o a süd in tu resplanduu diàfanu de na lengua de mà. Vallè n'uuta de antighe sulidarietè, cunsuetüdini cumünitaje, ampiéssa de scösse, richéssa d'ègue. Ma anche de tere luntaŋŋe e sciti dezerti, de vitte früstè in se urizunti sempre paegi, de rivalitè antighe e sangünente. Vallè ancö` fete de selve spésse, paixi aruinè duv'à guagnu e spiŋŋe, serè in tu lüvegu de l'abandun.

Paolo Ferrari Magà
(Dalla val Trebbia alle "molte province" = World music magazine. 62 : 2003.10. p 5-7)

Dunde u cumensa l'Apenin : note culturali e naturalistiche sul territorio delle Quattro Province / redasiun ; Ettore Molini : versione in dialetto di Carsi (val Brevenna) ; © autui -- <http://www.appennino4p.it/index.cr.html> : 2006.06 - 2007.04 -