S'Appenninu est sa serra 'e montes ca s'irviluppat che un ossadura pro totta sa parte a tramuntana de sa penisula italiana. Si pesat dae su passu Turchino, intras Genova Voltri e Alessandria *. Calincunu ipotizzat ca su lumene "Appennino" falet dae su deus Pen, su deus ligure de sos patentes e de sos montes e dae su matessi lumene diant esser orizinados finas atteros lumenes de montes comente Penna e Pénice.
Custas pazinas sun dedicadas a su primmu trettu a tramuntana de s’Appenninu, unu grustu de montes e baddes cumpartidas dae su puntu de bista amministrativu in battor provinzias pertoccantes a battor differentes regiones: Genova (Liguria), Alessandria (Piemonte), Pavia
(Lombardia) e Piacenza (Emilia-Romagna).
Culturalmente, peroe, est un'area omogenea in ue pro seculos sa zente at bividu in sa matessi manera (laorande cereales, patatas e castanzas, allevande crabas e baccas, fraigande biddas chi s'assimizzant pro caratteristicas de ammaniu, ecc.) e pro sa zente fiat pius fazile a si connoschere e a si coiuare a intro sas baddes montanninas, prusaprestu ca cun zente de sos pranos de sas matessi regiones. Custa unitade culturale est testimoniada mescamente in sa musica de tradissione populare, ca propiu pro custu est muttida Quattro Province: espressione chi nos paret prus dechida pro s'area chi semus trattande.
Una terra 'e pontes
S'ischit chi s'immaginariu populare acumonat su fabbricu de unu ponte cun s'idea che su diaulu che ponzat sa coa pro lu distruer. Fazile est a cumprender proitte: su diaulu est "su chi dividit". [...] In sa cultura populare, mescamente che unu fogliette ch'istrobbat, prusapprestu che s'incarnassione de su male assoludu, su diaulu ponet cun sas suas assiones negativas, s'immagine de sa contraddiscione chi s'accattat in calesisiat assione chi cherzat aunire, cabulare dae un'ala a s'attera, giampare. In fundu peroe, su disisperadu opponimentu 'e su diaulu a cuntattos, ligamenes e comunicassiones attit forzis unu prinzipiu de balore: sa defensa 'e s'identitade e de s'ispecificitade, male cumpresa peroe, che unu tancaresi dae s'atteru e comente unu refudu assoludu chi nudda produit.
Si su ponte gobbosu de Bobbio chi aunit sas duas ispondas de su Trebbia m'at fattu meledare custos cussideros es pro ca in custas baddes chi semus abituados a lumenare "de sa Battor Provinzias" si dat a bidere in prenu sa cumplessitade de sos temas, contradditorios e chi piccant meda formas, de unidade e cuntierra, tancaduras e cambiapares, aberturas e isolamentu. Sun baddes attraessadas dae camineras bezzas de miza e miza annos, camineras chi falant a mare e camineras de su sale, chi colant peri trettos fattos de predichinas e currentes de abbas, ossiat chi pigant in pizzu 'e sas serras, colore 'e chelu e birdes, chi s'ispigant car'a tramuntana in sas nebidas de sos pranos e car'a mesudie in sa trasparenzia lughente 'e unu trettu 'e mare. Baddes de antiga solidarietade e de connottu cumone, de pasturas mannas e de abbas bundanziosas. Ma finas de bruncos attesos cun faladas diffiziles, de esistenzias consumidas in su propiu orizonte, de disamistades antigas e sambenosas. Baddes in ue sas mattas abbuschidas las faghen oe malas a rucrare e in ue sos biddighinzos sun arruinandes in su trionfu 'e sas piantas, inghiriados dae sa sumbra 'e su disamparu.