L'Apenin, la cadena da montagn che la traversa cumè un firon l'intrega penísula taliana, al cumenza apröv ul pass dal Türchin, intra Vultri e Lissàndria*. Cheidügn al considera che 'l nomm Penin al vegna giò da Pen, díuv ligürin di bosch e montagn, dond al saress derivaa i nom medem di munt cumè Penna e Pénis.
Sti pàgin-scia i è dedicad al prim trait septentrional da l'Apenin, un grup da montagn e valer spartid, dal punt da vista aministrativ, in mia manch che quatar provenz da quatar reson diferent: Zena (Ligüria), Lissàndria (Piemont), Pavia (Lumbardia) e Piasenza (Mília-Rumagna). Cültüralament, purtant, om trata d'una àrea omogénia, dond i gent i ha traa inanz par sécoj a viv dabòt in la medema manera (piantant furment, pomm-da-tèra e castegn, trant sü di càvar e vach, fabricant di país da forma característiga etc.), e i s'ha cognossüü e casaa püssée facilment d'una olta valera a l'oltra che mia vers la bassa. Chela ünitaa-chí a l'è testimuniada suratüt par la müsica popülara tradizzionala, definida donca müsica di Quatar Pruvenz, l'espression la püssée adaptada a parlà da chesta àrea-chí.
Una tera da punt
Om sa che l'imaginari popüler al cöbia normalment l'idea da buidà un punt à l'intervenzion derangianta dal rabói, e al è fàcil da capínn la reson: i pont i liga, ul rabói al spartiss. In la cültüra popülara püssee bargnif che incarnazion dal mal absolüü, ul rabói al insinüa, par i sò azion negativ, l'imàgen da la contradizion inerent cada sfòrz tendüü à trá insema, passá un giögh o vadá una fiüm. In fin di cünt, la sò desperada oposizion a la creazion da contat, rapòrt e comünicazion la comporta na qual valur: la difesa da l'identitaa e da la specificitaa, anca se deformada int al malintes da la seradüra a l'oltar, dal refüs absulüü e senza fütür.
Se ul pont göp da Bòbi, ch'al tra insema i dò riv opòst da la Trébia, al m'ha fai pensà sü à sti paròl-scia, al è par che, in sti valad, ch'om ha oramai l'abitüd da ciamá di Quatar Provenz, al sa manifesta la complessitaa e la multiplicitaa di contradizion intra ünion e conflit, baradüra e scambi, avertüra e isolament. Di valer parcorüd par di strad milenari, andàir dal mar e da la sal, par di plòch e curent d'aigua, o anca in tra i scim di montagn, da celest e verd, refletüd a nòrd ind i scigher da la bassa e a süd ind al sbarlüsc diafan d'un mantin da mar. Di valer un temp d'antigh solidaritaa, costüm comünitari, gran spazi da pastüra, bundanza d'aigua. Ma anca da balm à strapiomb e cius delogn, e da esistenz faid fö in sempru eguaj orizon, da rivalitaa andegh e sanguign. Di valer, al dí d'incöj, da spess intrigad par la selva, par di burgh in ruina, faid sü par un trionf da vegetazion, sarad sü ind una bruma da bandon.
Paolo Ferrari Magà
(Dalla val Trebbia alle "molte province" = World music magazine. 62 : 2003.10. p 5-7)